Samfélagsmiðlar

Samfélagsmiðlar og samtakamáttur

February 14, 2018
by dewice

Í starfi mínu sem vefráðgjafi koma alls konar verkefni inn á mitt borð. Eitt af þeim er markaðssetning á samfélagsmiðlum, sem er frábært þegar maður starfar fyrir félagasamtök eða áhugamannahópa sem ekki hafa mikla fjármuni til ráðstöfunar þegar kemur að markaðssetningu. Ef einhverjir aurar eru til, þá skiptir miklu máli að reyna að nýta þá sem best.

Misjafnt er hvaða skilning viðskiptavinirnir leggja í markaðssetningu á samfélagsmiðlum. Til að byrja með þarf að móta stefnu. Stefnu um:

hvaða samfélagsmiðla á að nota?
hvaða markmið er með markaðssetningunni?
efni, hverju á að deila?
ábyrgð, hver á að sjá um það?
eftirfylgni, hvaða árangri erum við að ná?
stefnubreyting, hvað virkar og hvað ekki?

Samtakamáttur: máttur sem fólginn er í sameiginlegri baráttu eða átaki, er skilgreining orðabókar á hugtakinu.

Á samfélagsmiðlunum virka hlutirnir nefnilega í báðar áttir, efnið sem þú póstar er alls ekki allt sem skiptir máli. Þú átt vini eða fylgjendur, taktu þátt í umræðunni, skrifaðu athugasemdir við færslur hjá öðrum og láttu þér líka við það sem aðrir hafa fram að færa. Deildu efni frá öðrum, frá birgjum, samstarfsaðilum, viðskiptavinum, vinum. Ef þú rekst á áhugavert efni, fáðu leyfi til að deila því.

Markmiðið getur verið að vera fræðandi, skemmtilegt, eða ertu að gagnrýna og sýna öðrum eins og opinberum aðilum aðhald? Það getur ráðist af markmiðinu hvaða leiðir þú ferð, ertu að vinna með síðu eða hóp eða hvort tveggja? Eða ertu að kaupa auglýsingar, þá er nú eins gott að hafa markmiðin á hreinu. Ef þú vilt kaupa auglýsingu á samfélagsmiðlum, selja vörur á netinu, þá viltu vera með vef, vefverslun og greiðslugátt til þess að eiga þess kost að geta selt tilvonandi viðskiptavinum vörurnar eða þjónustuna.

Efnið getur verið margvíslegt, myndir, myndbönd, texti og tenglar. Vertu bara viss um að það sé í góðum gæðum, myndirnar í réttum stærðum og upplausn. Vandaðu textaskrifin, komdu í veg fyrir innsláttarvillur með því skrifa textann þar sem þú ert með innbyggðan yfirlestur, póstaðu svo. Grunnupplýsingar falla ekki úr gildi: Hver, hvað, hvenær, hvar, hvernig, hvers vegna og hvað svo?

Ábyrgðin þarf að vera skýr, hverjir framkvæma, hverjir svara þeim spurningum sem vakna. Sjálfvirk svör eru meðal þess sem í boði er á Facebook. Nýttu möguleikana.

Ekki byrja á öfugum enda, vertu með þitt á hreinu og þín markmið, gæðaefni, fallegar myndir, réttar vörulýsingar, ferli vefviðskiptanna uppsett og prófað á öllum snjalltækjum. Þegar þú hefur nýtt þínar bjargir (tíma og peninga) sem best í það, þá skaltu fara að huga að markaðssetningu á samfélagsmiðlum.

Þá máttu deila.

Vefur vikunnar

Topp tíu: Hvað veistu um vefinn þinn?

January 17, 2018January 17, 2018
by dewice

Um áramót verða tímamót og þá er gott að staldra við til þess að líta yfir farinn vef og huga að því hvert stefnan skal tekin í framtíðinni. Fyrir vefi mæli ég með því að nota tækifæri og skoða tölfræðina um umferð og efni hvers vefs.

Greiningartólið Google Analytics set ég upp og mæli með að allir viðskiptavinir mínir noti. Fyrir þá sem hafa alvöru áhuga á að nýta sér greiningartólið, mæli ég með því að setja Google Analytics appið upp í farsímanum þínum og þá ertu alltaf með yfirsýn yfir það helsta.

Topp tíu

Google Analytics getur svarað spurningum eins og:

Hve margir notendur komu i heimsókn á vefinn?
Hvað eyddu notendur löngum tíma á vefnum?
Á hvaða tíma dags komu notendur í heimsókn á vefinn?
Hve margar voru síðuflettingar á vefnum?
Hvert var hlutfall snjalltækja, farsíma og spjaldtalva á móti hefðbundunum tölvum?
Hvaðan komu notendurir; beint inn á vefinn eða gegnum leitarvélar eða samfélagsmiðla?
Hvaðan úr heiminum komu heimsóknir inn á vefinn?
Hvaða efni vefsins var eftirsóknarverðast?
Hvaða leitarorð voru slegin inn í leitarvél vefsins?
Hvaða tekjur voru af vefverslun, ef um vefverslun er að ræða?

Það að staldra við og rýna aðeins í tölfræðina á vefnum getur sagt þér ýmislegt um viðskiptavini þína og hjálpað þér að veita þeim þar með betri þjónustu. Ertu að ná til þeirra viðskiptavina sem þú vilt? Eru viðskiptavinir þínir að finna það efni sem þeir leita að á vefnum þínum? Eru helstu verkefni vefsins skilgreind og standast þau eða þarfnast þau endurskoðunar?

Viltu aðstoð?

Með greiningarvinnu geturðu líka tekið betri stefnu fram í framtíðina, þarf e.t.v. að bæta við efni á fleiri tungumálum? Þarftu að huga að leitarvélabestun á núverandi efnissíðum, þarf að rýna þær og endurskoða? Þarftu að móta, í ljósi nýrra upplýsinga betri vefstefnu?

Ég mæli með því að þú takir stöðuna á vefnum þínum, þó ekki sé nema einu sinni á ári, alveg eins og að fara með bílinn þinn í skoðun.

Ef þú vilt einhverja aðstoð, þá er velkomið að hafa samband, dew@webdew.is eða í síma 690 1205

Vefur vikunnar

Markaðssetning á samfélagsmiðlum

January 20, 2016
by dewice

Þessa dagana er ég að vinna að frábæru verkefni, markaðssetningu á samfélagsmiðlum fyrir átakið Fordómalaus. Fyrir átakið var valið að vera á Youtube annars vegar og Facebook hins vegar, enda samræmdist það markmiðum verkefnisins. Viðtökurnar hafa verið framar björtustu vonum það sem af er og við vonum svo sannarlega að það verði framhald á því.

Fyrir þá sem eru að hugsa um markaðssetningu á samfélagsmiðlum, eru nokkur atriði sem vert er að hafa í huga áður en haldið er af stað.

Á hvaða samfélagsmiðlum á ég að vera?
Á hvaða samfélagsmiðlum á ég ekki að vera?
Hver er markhópurinn?
Hvaða skilaboð er ég að senda?
Hvernig samskipti vil ég eiga við viðskiptavini mína?

Til frekara skrafs og ráðagerða er þér velkomið að hafa samband við dew@webdew.is.

Vefur vikunnar

Nýr vefur Unique hár og spa

October 22, 2015
by dewice

Á dögunum opnaði Unique hár og spa nýjan vef.

Markmiðið var að gera minimalískt útlit sem virkaði vel á snjallsímum. Leyfa glæsilegu myndefni sem prýðir stofuna að njóta sín á vefnum líka.

Spa hluti Unique hár og spa þurfti að fá meira pláss frá því sem áður var, til jafns við hár hlutann. Þá eru viðskiptavinir sífellt að spyrja um gjafabréf sem hægt er að gefa t.d. mömmu í jólagjöf eða slá saman handa tilvonandi brúður í gæsun. Lausnir við því voru dekurpakkarnir, sem hægt er að panta á netinu og svo kemur þú og sækir gjafabréf í Borgartúninu.

Samhliða nýjum vef Unique hár og spa, var farið yfir aðra vefmiðla, s.s. unique á ja.is og gerðar breytingar til samræmis við útlitið á nýja vefnum. Heildstæð notendaupplifun er það sem við erum að sækjast eftir.

Skoðaðu verkefnið og sjá hvað webdew annaðist.

Önnur verkefni geturðu skoðað hér.

Vefur vikunnar

Instagram og #þitteigiðhashtag

November 4, 2014
by dewice

Samfélagsmiðillinn Instagram

Einhver sagði einhvern tímann að Instagram væri eins og Twitter fyrir lesblinda. Ég kann betur við skýringuna að ein mynd segir oft meira en þúsund orð.

Instagram er samfélagsmiðill, þar sem þú getur deilt myndum og myndböndum með þeim sem fylgjast með þér (e. Followers). Einnig er hægt að senda, gegnum forritið, myndir og myndbönd til einstakra notenda. Rétt eins og SMS á spjallsímum.

Notkunin þar getur gert mann alveg rosalega svangan, því það er mikið um myndir af mat. En eins og aðrir samfélagsmiðlar þá er Instagram líka leið til þess að halda sambandi við fólk, yfir höf og lönd.

Og þarna sé ég líka barnamyndir af frændfólki mínu, sem ég hitti annars eiginlega bara þegar við erum fyrir norðan í jólafríum og sumarfríum. Nú þarf ég ekki lengur að fara í kaffi, ég er búin að gera <3 á myndirnar af barninu þegar það stóð upp og búin að sjá fyrir og eftir myndirnar af framkvæmdunum á baðherberginu. Ætti nú samt að fara að drífa mig í kaffi, þetta gengur ekki.

#Þitteigiðhashtag

#Hashtög hafa verið notuð síðan á IRC-inu 1988 svo þau eru ekki nýtilkomin. Þá, eins og nú, eru þau notuð til þess að draga efni í dilka, eða flokka, nokkurs konar samnefnari.

Hashtögin eru notuð á samfélagsmiðlum þannig að þeir sem hafa áhuga á því að taka þátt í umræðu um ákveðið málefni, geta fylgt þeim þræði. Dæmi um þetta eru og #12stig á Twitter. Þar leyfa Íslendingar sér að vera kaldhæðnir og ég verð að viðurkenna að þetta eykur skemmtanagildi Eurovision töluvert. Aðrir virðast vera sammála, þar sem fjöldi íslenskra notenda bætist við á Twitter í maí ár hvert.

Ég byrjaði nýlega að nota #dewice til viðbótar við instagram.com/dewiceland, fyrst og fremst til þess að styrkja vörumerkið, það er mjög mikilvægt að þú eigir sjálfur þín eigin orð / vörumerki í #hashtag útgáfu.

Nafna mín í Tælandi, hefur líka verið að nota #dewice, en hún er eigandi Wake Cup Coffee en ég hefði ekki hugmynd um tilvist hennar og hennar fyrirtækis nema fyrir sama hashtagið á Instagram. Þetta gerir lífið skemmtilegt, og heiminn lítinn.

En þetta undirstrikar mikilvægi þess að þitt vörumerki / fyrirtæki velji rétt #hashtag til að nota, og ég legg sérstaka áherslu á að eiga sín eigin orð.

Notkun #hashtag

Það eru fjölbreyttir notkunarmöguleikar fólgnir í notkun #hashtag.

Dæmi er að nota síðustu myndina sem þú póstaðir á Instagram, eins og ég nota í hægri valmynd þessa vefs.

Ef þú vilt fá notendur / gesti til að nota ákveðið #hashtag, þá þarftu líka að vera tilbúin til þess að horfast í augu við það að það verða ekki endilega allar myndirnar að þínu skapi. En þá þýðir ekkert að fara í fýlu, þá og einmitt þá, er áskorunin að bregðast við og það er það sem markaðssetning á netinu snýst svo oft um.

En mynd getur svo sannarlega sagt meira en þúsund orð.

Two Hearts - Finnbow — Two Hearts – ©Finnbow

Vefur vikunnar

Pinterest, sofandi risi?

October 27, 2014
by dewice

Vefur vikunnar er vaxandi samfélagsmiðill, Pinterest.

Pinterest, fyrir þá sem ekki vita, er nokkurs konar minnistafla eða korkur þar sem þú getur “hengt” myndir til minnis um hitt og þetta og allt milli himins og jarðar. Nafnið er samsett úr Pin (teiknibóla) og Interest (hugðarefni).

Virknin að bókamerkja síður hefur verið þekkt frá fyrstu vöfrum og margir netnotendur nota flýtileiðir bókamerkja (e. bookmarks) mikið. Pinterest hefur búið til þessa virkni á vef, sem þú hefur aðgang að á netinu, óháð því hvaða tæki þú ert að nota, tölvuna, snjallsímann, þá geturðu alltaf gripið í þetta “Hvar var nú aftur….”

Leyndarmál Pinterest

Þú gerist eltihrellir vina þinna til þess að fylgjast með því hvað það er sem þeir hafa áhuga á. Til þess að missa ekki yfirsýn, þá búum við sjálf til flokkana okkar, eigum nokkrar töflur (e. board) til þess að hengja á.

Fyrir konu í fæðingarorlofi, bara með aðra hendina lausa á snjallsímann er bæði hægt að skipuleggja brúðkaup og skírn. Og fá fullt að hugmyndum um jólaskreytingar, uppskriftir. En Pinterest er ekki lengur bara fyrir konur, á síðustu mánuðum eru fleiri og fleiri karlkyns notendur búnir að tileinka sér þessa þægilegu, myndrænu “til minnis töflu”. Að það er hægt að hafa töflurnar leyndarmál (e. secret) svo að vinir þínir þurfa ekkert að vita hvað þú ert að bralla.

Samfélagsmiðillinn Pinterest

Í markaðssetningu á netinu, hefur Pinterest verið kallað sofandi risi og með nýlegum breytingum virðist hann vera að vakna. Persónulega man ég þá tíð að hugsunin fór í gegn hjá mér: “Get ég ekki hengt þetta á vegginn hjá Ellu?” en það var áður en hægt var að senda Pin til vina sinna. Nú er hægt að eiga samskipti, um hverja mynd fyrir sig.

Dæmi: Ég sé þessa fínu mynd af heklaðri barnahúfu. Ég veit að ég get heklað til að bjarga lífi mínu, en systir mín er fljótari að því (og gerir það betur). Ég get núna sent henni myndina, með skilaboðum um að ég myndi þiggja svona að gjöf handa dóttur minni.

Pinterest í netmarkaðsetningu

Pinterest er sterkur miðill í netmarkaðssetningu, þú getur sjálfur hlaðið upp þínum eigin myndum og sett slóðir á þær. Ég hef notað Pinterest fyrir dewice vörumerkið mitt. Því mæli ég með því að þú bætir við “pin on Pinterest” til þess að auðvelda viðskiptavinum þínum að muna eftir þér og eiga samskipti við þig.

Galdurinn við Pinterest er að fallegt myndefni festist vel í minni, það á jafnt við um girnilegar uppskriftir og vörur eða þjónustu sem þú vilt koma á framfæri. Notaðu bara góðar myndir!

já, á Pinterest eru alltaf jólin.